0:00
/
1ܘܓ̰ܡܸܥܠܗ݇ܘܿܢ ܠܟܸܣܠܹܗ ܦܪ̈ܝܼܫܹܐ ܘܚܲܕ݇ܟܡܵܐ ܡ̣ܢ ܣܵܦܪܹ̈ܐ ܕܐ݇ܬܹܐܠܗܘܿܢ ܡ̣ܢ ܐܘܿܪܸܫܠܸܡ. 2ܘܚܙܹܐܠܗܘܿܢ ܐ݇ܢܵܫܹ̈ܐ ܡ̣ܢ ܬܲܠܡܝܼܕܘܼ̈ܗܝ ܕܒܹܐܟ̣ܵܠܵܐ ܠܲܚܡܵܐ ܒܐܝܼܕܵܬܹ̈ܐ ܛܲܡܹ̈ܐܐ: ܝܲܥܢܹܐ: ܠܵܐ ܚܘܼܠܸܠܹ̈ܐ. 3ܣܵܒܵܒ ܦܪ̈ܝܼܫܹܐ ܘܟܠܵܝܗܝ ܝܗَܘܼܕܵܝܹ̈ܐ: ܐܸܢ ܒܚܲܡܚܘܵܪܘܼܬܵܐ ܠܵܐ ܚܲܠܸܠܝܼ ܐܝܼܕܵܬܵܝ̈ܗܝ: ܠܹܐ ܐܵܟ̣ܠܝܼ: ܒܸܕܒ̣ܵܩܵܐ ܠܣܵܦܝܵܢܘܼܬܵܐ ܕܚܘܵܪ̈ܕܸܩܢܹܐ. 4ܘܡܢ ܫܘܼܩܵܐ: ܐܸܢ ܠܵܐ ܚܲܠܸܠܝܼ: ܠܹܐ ܐܵܟ̣ܠܝܼ ܘܐܝܼܬ ܪܵܒܵܐ ܡܸܢܕܝܼܵܢܹ̈ܐ ܐ݇ܚܹܪ̈݇ܢܹܐ: ܐܵܢܝܼ ܕܩܘܼܒܸܠܗܘܿܢ ܕܢܵܛܪܝܼ: ܚܲܠܲܠܝܵܬܹ̈ܐ ܕܟܵܣܹ̈ܐ ܘܒܵܕ̈ܝܹܐ ܘܡܵܐܢܹ̈ܐ ܕܢܚܵܫܵܐ: ܘܨܘܼܦܪܹ̈ܐ. 5ܘܒܘܼܩܸܪܗܘܿܢ ܡܸܢܹܗ ܣܵܦܪܹ̈ܐ ܘܦܪ̈ܝܼܫܹܐ: ܩܵܡܘܿܕܝܼ ܬܲܠܡܝܼܕܘܼ̈ܟ ܠܹܐ ܝܢܵܐ ܒܸܚܕܵܪܵܐ ܐܲܝܟܼ ܣܵܦܝܵܢܘܼܬܵܐ ܕܚܘܵܪ̈ܕܸܩܢܹܐ: ܐܸܠܵܐ ܟܲܕ ܠܵܐ ܚܘܼܠܸܠܹ̈ܐ ܐܝܼܕܵܬܵܝ̈ܗܝ ܒܹܐܟ̣ܵܠܵܐ ܝܢܵܐ ܠܲܚܡܵܐ. 6ܐܝܼܢܵܐ ܗ̇ܘ ܐَܡܝܼܪܹܗ ܐܸܠܵܝܗܝ: ܨܦܵܝܝܼ ܢܘܼܒܹܠܹܗ ܥܲܠܵܘܟ̣ܘܿܢ ܐܹܫܲܥܝܵܐ: ܢܵܣܒܲܝ̈ ܒܐܲܦܹ̈ܐ: ܐܲܝܟܼ ܕܝܼܠܹܗ ܟܬܝܼܒ̣ܵܐ: ܕܐܵܗܵܐ ܛܵܝܦܵܐ ܒܣܸܦܘܵܬܹ̈ܗ ܟܹܐ ܥܵܒܸܕ ܐܝܼܩܵܪܵܐ ܐܸܠܝܼ: ܐܝܼܢܵܐ ܠܸܒܵܝܗܝ ܪܵܒܵܐ ܪܸܚܩܵܐ ܝܠܹܗ ܡܸܢܝܼ. 7ܘܒܒܵܛܝܼܠܘܼܬܵܐ ܟܹܐ ܣܵܓ̣ܕܝܼ ܐܸܠܝܼ: ܟܲܕ ܡܵܠܘܿܦܹܐ ܝܘܼܠܦܵܢܹ̈ܐ: ܦܘܼܩܕܵܢܹ̈ܐ ܕܒܢܲܝ̈ܢܵܫܵܐ. 8ܫܒܸܩܠܵܘܟ̣ܘܿܢ ܦܘܼܩܕܵܢܵܐ ܕܐܲܠܵܗܵܐ: ܘܕܒ̣ܝܼܩܹܐ ܝܬܘܿܢ ܣܵܦܝܵܢܘܼܬܵܐ ܕܒܢܲܝ̈ܢܵܫܵܐ. 9ܐܵܡܸܪ ܐܸܠܵܝܗܝ: ܨܦܵܝܝܼ ܟܹܐ ܒܵܛܠܝܼܬܘܿܢ ܠܦܘܼܩܕܵܢܵܐ ܕܐܲܠܵܗܵܐ: ܕܢܵܛܪܝܼܬܘܿܢ ܠܣܵܦܝܵܢܘܼܬܵܘܟ̣ܘܿܢ. 10ܣܵܒܵܒ ܡܘܼܫܹܐ ܐَܡܝܼܪܹܗ: ܥܒ̣ܘܿܕ ܐܝܼܩܵܪܵܐ ܠܒܵܒܘܼܟ ܘܠܝܸܡܘܼܟ: ܘܡ̇ܢ ܕܨܵܥܸܪ ܠܒܵܒܵܐ ܝܲܢ ܠܝܸܡܵܐ: ܡܵܘܬܵܐ ܡܵܝܸܬ. 11ܐܝܼܢܵܐ ܐܲܚܬܘܿܢ ܟܹܐ ܐܵܡܪܝܼܬܘܿܢ: ܐܸܢ ܐ݇ܢܵܫܵܐ ܐܵܡܸܪ ܠܒܵܒܹܗ ܝܲܢ ܠܝܸܡܹܗ: ܩܘܼܪܒܵܢ: ܝܲܥܢܹܐ: ܢܸܕܪܵܐ: ܡܸܢܕܝܼ ܕܡܸܢܝܼ ܙܵܝܕܸܬ ܗ݇ܘܵܐ. 12ܐ݇ܚܹܪ݇ܢܵܐ ܠܹܐ ܝܬܘܿܢ ܒܸܫܒ̣ܵܩܵܐ ܐܸܠܹܗ ܕܥܵܒܸܕ 13ܡܸܢܕܝܼ ܩܵܐ ܒܵܒܹܗ ܝܲܢ ܝܸܡܹܗ. ܘܒܵܛܘܿܠܹܐ ܝܬܘܿܢ ܠܗܹܡܸܙܡܵܢ ܕܐܲܠܵܗܵܐ ܒܣܵܦܝܵܢܘܼܬܵܘܟ̣ܘܿܢ ܕܣܘܼܦܹܠܵܘܟ̣ܘܿܢ. ܘܪܵܒܵܐ ܡܸܢܕܝܵܢܹ̈ܐ ܕܟܹܐ ܕܵܡܝܼ ܠܐܲܢܹܐ ܟܹܐ ܥܵܒ̣ܕܝܼܬܘܿܢ. 14ܘܩܪܹܐܠܹܗ ܝܼܫܘܿܥ ܠܟܠܹܗ ܟܸܢܫܵܐ ܘܐَܡܝܼܪܹܗ ܐܸܠܵܝܗܝ: ܫܡܸܥܡܘܿܢ ܐܸܠܝܼ ܟܠܵܘܟ̣ܘܿܢ: ܘܦܲܪܡܹܡܘܿܢ. 15ܠܲܝܬ ܡܸܢܕܝܼ ܕܠܒܲܕܲܪ ܡ̣ܢ ܒܲܪܢܵܫܵܐ ܝܠܹܗ: ܘܥܵܒܼܸܪ ܓܵܘܹܗ ܡܵܨܹܐ ܡܛܲܡܹܐܐ ܠܹܗ: ܐܸܠܵܐ ܡܸܢܕܝܼ ܕܦܵܠܸܛ ܡܸܢܹܗ: ܗ̇ܘ ܝܼܠܹܗ ܕܟܹܐ ܡܛܲܡܹܐܐ ܠܒܲܪܢܵܫܵܐ. 16ܡ̇ܢ ܕܐܝܼܬ ܠܹܗ ܢܵܬܝܵܬܹ̈ܐ ܕܫܵܡܸܥ: ܫܵܡܹܥ. 17ܘܟܲܕ ܥܒܼܸܪܹܗ ܠܒܲܝܬܵܐ ܡ̣ܢ ܟܸܢܫܵܐ: ܒܘܼܩܸܪܗܘܿܢ ܡܸܢܹܗ ܬܲܠܡܝܼܕܘܼ̈ܗܝ ܥܲܠ ܡܵܣܵܠܵܐ. 18ܘܐܵܡܸܪ ܐܸܠܵܝܗܝ: ܗܲܕܟ̣ܵܐ ܐܘܼܦ ܐܲܚܬܘܿܢ ܕܠܵܐ ܦܲܪܡܵܝܬܵܐ ܝܬܘܿܢ: ܠܹܐ ܝܬܘܿܢ ܒܝܼܕܵܥܝܵܐ ܕܟܠ ܡܸܢܕܝܼ ܕܡ̣ܢ ܠܒܲܕܲܪ ܥܵܒܼܸܪ ܓܵܘ ܒܲܪܢܵܫܵܐ: ܠܹܐ ܡܵܨܹܐ ܕܟ̰ܲܦܠܸܢܹܗ. 19ܣܵܒܵܒ ܕܠܹܐ ܝܠܹܗ ܓܵܘ ܠܸܒܹܗ ܒܸܥܒܼܵܪܵܐ: ܐܸܠܵܐ ܓܵܘ ܟܹܪَܣܹܗ: ܘܟܹܐ ܪܘܼܦܝܵܐ ܠܒܲܕܲܪ ܒܕܵܟ̣ܵܝܬܵܐ: ܕܕܵܟܼܝܵܐ ܟܠܵܗ̇ ܡܹܐܟ̣ܘܼܠܬܵܐ. 20ܘܐَܡܝܼܪܹܗ: ܡܸܢܕܝܼ ܕܦܵܠܸܛ ܡ̣ܢ ܒܲܪܢܵܫܵܐ: ܗ̇ܘ ܟܹܐ ܟ̰ܵܦܠܸܢ ܠܒܲܪܢܵܫܵܐ. 21ܣܵܒܵܒ ܡ̣ܢ ܠܓܵܘܵܝܝܼ: ܡ̣ܢ ܠܸܒܵܐ ܕܒܢܲܝ̈ܢܵܫܵܐ: ܟܹܐ ܦܵܠܛܝܼ ܚܘܼܫܵܒܹ̈ܐ ܒܝܼܫܹ̈ܐ: ܩܲܗܒܘܼܝܵܬ̈ܵܐ: ܙܵܢܝܘܼ̈ܝܵܬܵܐ: ܓܹܢܵܒ̣ܘܼ̈ܝܵܬܵܐ: ܩܸܛܠܹ̈ܐ. 22ܛܲܡܲܥܟܵܪ̈ܘܼܝܵܬܵܐ: ܒܝܼܫܘܼ̈ܝܵܬܵܐ: ܥܲܠܕܵܝܬܵܐ: ܠܵܘܬܝܼܘܼܬܵܐ: ܥܲܝܢܵܐ ܒܝܼܫܬܵܐ: ܓܘܼܕܵܦܵܐ: ܫܲܒ̣ܗܪܵܢܘܼܬܵܐ: ܐܲܗܡܲܩܘܼܬܵܐ. 23ܐܲܢܹܐ ܒܝܼܫܵܬܹ̈ܐ ܟܠܵܝܗܝ ܡ̣ܢ ܠܓܵܘܵܝܝܼ ܟܹܐ ܦܵܠܛܝܼ: ܘܟܹܐ ܡܛܲܡܐܝܼ ܠܒܲܪܢܵܫܵܐ. 24ܡ̣ܢ ܬܵܡܵܐ ܩܸܡܠܹܗ: ܘܦܠܸܛܠܹܗ ܠܬܸܚܘܼܒ̣ ܕܨܘܿܪ ܘܕܨܲܝܕܘܿܢ. ܘܥܒܼܸܪܹܗ ܠܚܲܕَ ܒܲܝܬܵܐ: ܘܠܹܐ ܒܵܥܝܹܐ ܗ݇ܘܵܐ ܕܐ݇ܢܵܫܵܐ ܝܵܕܸܥ: ܘܠܵܐ ܡܨܹܐܠܹܗ ܕܛܵܫܹܐ ܗ݇ܘܵܐ. 25ܣܵܒܵܒ ܕܕܲܪܣܵܥܲܬ ܫܡܸܥܠܵܗ̇ ܚܕܵܐ ܒܲܟ̣ܬܵܐ ܒܵܗܣܹܗ: ܕܐܝܼܬ ܗ݇ܘܵܐ ܠܒܪܵܬܘܼܗ̇ ܙܥܘܿܪܬܵܐ ܪܘܼܚܵܐ ܛܲܡܹܐܐ: ܘܐَܬܹܐܠܗ̇ ܢܦܸܠܵܗ̇ ܩܵܕَܡ ܐܲܩܠܘܼ̈ܗܝ. 26ܐܝܼܢܵܐ ܗ̇ܝ ܒܲܟ̣ܬܵܐ ܚܲܢܦܬܵܐ ܗ݇ܘܵܐ: ܒܡܸܠܲܬ ܦܹܘܢܝܼܩܵܝܬܵܐ ܕܣܘܼܪܝܼܵܐ: ܘܦܲܪܦܸܠܵܐ ܗ݇ܘܵܐ ܒܝܹܗ ܕܦܵܠܸܛ ܠܕܲܝܘܵܐ ܡ̣ܢ ܒܪܵܬܘܼܗ̇. 27ܘܐَܡܝܼܪܹܗ ܐܸܠܵܗ̇: ܫܒ̣ܘܿܩܝ ܩܵܕَܡܵܝܬܵܐ ܣܲܒ̣ܥܝܼ ܒܢܘܿܢܹ̈ܐ: ܣܵܒܵܒ ܠܹܐ ܝ݇ܠܵܗ̇ ܨܦܵܝܝ ܕܫܵܩܠܵܚ ܠܲܚܡܵܐ ܕܒܢܘܿܢܹ̈ܐ ܘܕܵܪܵܚ ܠܟܲܠܒܹ̈ܐ. 28ܐܝܼܢܵܐ ܗ̇ܝ ܓ̰ܘܼܘܸܒܠܵܗ̇ ܘܐܵܡܪܵܗ̇ ܐܸܠܹܗ: ܗܹܐ: ܡܵܪܝܼ: ܐܘܼܦ ܟܲܠܒܹ̈ܐ ܡ̣ܢ ܬܚܘܿܬ ܨܘܼܦܪܹ̈ܐ ܟܹܐ ܐܵܟ̣ܠܝܼ ܦܸܪ̈ܬܘܼܚܹܐ ܕܒܢܘܿܢܹ̈ܐ. 29ܐܵܡܸܪ ܐܸܠܵܗ̇: ܙܹܠَܐܝ: ܣܵܒܵܒ ܕܐܵܗܵܐ ܗܹܡܸܙܡܵܢ: ܦܠܸܛܠܹܗ ܕܲܝܘܵܐ ܡ̣ܢ ܒܪܵܬܵܟ̣ܝ. 30ܘܐَܙܸܠܵܗ̇ ܠܒܲܝܬܘܼܗ̇: ܘܡܘܼܫَܟ̰ܸܚܠܵܗ̇ ܠܒܪܵܬܘܼܗ̇ ܢܦܝܼܠܬܵܐ ܒܫܘܝܼܬܵܐ: ܘܦܠܝܼܛܵܐ ܡܸܢܵܗ̇ ܕܲܝܘܵܐ. 31ܡܸܢَܕܪܸܫَ ܦܠܸܛܠܹܗ ܡ̣ܢ ܬܸܚܘܼܒ̣ ܕܨܘܿܪ: ܘܐَܬܹܐܠܹܗ ܡ̣ܢ ܓܵܘ ܨܲܝܕܘܿܢ ܠܝܵܡܵܐ ܕܓܠܝܼܠܵܐ: ܡ̣ܢ ܠܵܘܵܐ ܕܬܸܚܘܼܒܹ̈ܐ ܕܥܸܣܪܲܬ ܡܕܝܼ̈ܢܵܬܵܐ. 32ܘܡܘܼܬَܝܹܠܗܘܿܢ ܠܟܸܣܠܹܗ ܚܲܕَ ܟܲܪܵܐ ܦܸܠܬܸܟ: ܘܦܲܪܦܸܠܝܼ ܗ݇ܘܵܘ ܒܝܹܗ ܕܡܲܬܸܒ̣ ܗ݇ܘܵܐ ܥܲܠܘܼܗܝ ܐܝܼܕܵܐ. 33ܘܓܪܸܫܠܹܗ ܡ̣ܢ ܟܸܢܫܵܐ ܒܢܲܦ̮ܫܹܗ: ܘܡܚܹܠܹܗ ܨܸܒܥܵܬܹ̈ܗ ܒܢܵܬܝܵܬܘܼ̈ܗܝ: ܘܪܸܩܠܹܗ: ܘܕܩܸܪܹܐ ܒܠܸܫܵܢܹܗ. 34ܘܚܸܪܹܗ ܒܫܡܲܝܵܐ ܘܬܘܼܢܸܚܠܹܗ: ܘܐَܡܝܼܪܹܗ ܐܸܠܹܗ: ܐܸܬ̣ܦܲܬܲܚ: ܝܲܥܢܹܐ: ܦܘܼܫ ܦܬܝܼܚܵܐ. 35ܘܦܸܫܠܗَܘܿܢ ܦܬܝܼܚܹܐ ܢܵܬܝܵܬܘܼ̈ܗܝ: ܘܦܸܫܠܹܗ ܫܸܪܝܵܐ ܝܸܣܘܼܪܵܐ ܕܠܸܫܵܢܹܗ: ܘܗܘܼܡܙܸܡܠܹܗ ܒܨܸܦܝܘܼܬܵܐ. 36ܘܦܩܸܕܠܹܗ ܕܠܐ݇ܢܵܫܵܐ ܠܵܐ ܐܵܡܪܝܼ ܗ݇ܘܵܘ. ܘܟܡܵܐ ܕܗ̇ܘ ܦܩܝܼܕܵܝܠܹܗ ܐܵܢܝܼ ܒܘܼܫ ܙܵܘܕܵܐ ܡܲܟܪܸܙܝܼ ܗ݇ܘܵܘ. 37ܘܙܵܘܕܵܐ ܙܵܘܕܵܐ ܥܵܓ̰ܸܒܝܼ ܗ݇ܘܵܘ: ܘܐܵܡܪܝܼ: ܕܟܠ ܡܸܢܕܝܼ ܨܦܵܝܝܼ ܥܒ̣ܝܼܕܵܐ ܝܠܹܗ: ܐܘܼܦ ܠܟܲܪܹ̈ܐ ܟܹܐ ܥܵܒܸܕ ܕܫܵܡܥܝܼ: ܘܠܐܵܢܝܼ ܕܠܹܐ ܗܲܡܙܸܡܝܼ ܕܗܲܡܙܸܡܝܼ.